Amanda Seyfried jinsiy sahnalar va «begona odam bilan yalang‘och bo‘lish» sababli rolni rad etganini aytdi
Amanda Seyfried ekrandagi jinsiy sahnalarga munosabati o‘zgarganini aytdi.
Aktrisa bu haqda oy boshida Hamptons International Film Festival doirasida Alec Baldwin bilan suhbatda so‘zlagan. Uning aytishicha, u ko‘p intim sahnalarni talab qilgan teleserialdagi rolni rad etgan. Seyfried loyiha tafsilotlarini ochiqlamadi, biroq sahna kim bilan bo‘lishidan qat’i nazar, hozir faoliyatining bu bosqichida ekrandagi jinsiy sahnalarda qatnashishni istamasligini bildirdi.
40 yoshli aktrisa bunday suratga olishlarda o‘zini noqulay his qilishini va «begona odam bilan yalang‘och bo‘lish»ni xohlamasligini ta’kidladi. U kelajakda fikri o‘zgarishi mumkinligini ham istisno etmadi. Seyfried avval Chloe (2009), Lovelace (2013) va The Testament of Ann Lee (2025) filmlarida ancha ochiq sahnalarda rol ijro etgan.